फुलोरा रोवण्यासाठी देतात
सुंदर सुंदर बिज विचारांचं
विचार घेऊन कवि कवियत्री
मोड आणतात काव्य अंकुराचं
विविध वैचारिक मंथन करून
घालतात खत पाणी अलंकारांची
हळूहळू तरंगत पालवी फुटुन
डोलतात कडवी भावनांची
शृंगार वीर करुण हास्य व्यंग
सांडतात विविध रस धारा
सौंदर्याचे लेणे घेऊन वाढतो
पिऊन शब्दांचा ऊन वारा
शब्द संपत्ती वाढवून उमलते
एक सुंदर कोमल कळी
जन्म घेऊन चार ओळींची
आकारात येते चारोळी
यौवनात येऊन बहरते
प्रफुल्लित विचारांचे झाड
विचारांच्या स्पंदनातुन निर्माण
होते कधी कवितेचे माड
विचारांचा झाडावर लागतात
लालित्यपूर्ण लेख कथा
आणि फुलतात काव्यात्मक
सुंदर कवितेच्या लता
सर्व कवी कवयित्री साठी
फुलोरा कलेचे माहेरघररुपी
विचारांच्या झाडावर बहरतात
कवितांच्या वेली आनंदरुपी
No comments:
Post a Comment
Thanks for the comments