भाज्यांची अंगणवाडी-2

 भाज्यांची अंगणवाडी

भाज्यांची सुरू झाली शाळा

मेथी आली आला गाजरमुळा

शेपुपालक घालून हातातहात

वांगे बटाटे बसले झोकात

बाकावर सजल्या भाज्या

अन् सुरू झाली बडबड

गलका केला गिलक्याने

उठे भोपळा करत गडबड

धक्का लागला गावरान

नाजूक कोवळ्या काकडीचा

घरंगळत खाली पडला अन्

लाल झाला गाल टोमॅटोचा

लाल वस्त्र आपलं काढत

धुसफूस करत आला कांदा

अदरकचा आढ्यावेढ्याने

लसणाबरोबर केला वांधा

हिरव्या ड्रेसमध्ये आल्या 

लगबगीने नाजूक भेंडी बाई

पाणी शिंपडून करत शांत

शिकवण्यासाठी केली घाई

मुळातच हुशार शुभ्र मुळा 

झाला वर्गात पहिला माॅनिटर

ढोबळी मिरची दोडका आणि 

कारली यांची बंद झाली टरटर

©ॐप्रकाश